minn Peter Dacoutros

Ingredjenti:

• 500g dqiq plain
• Niskata melħ
• 3 kuċċarini ħmira instant
• 4 kuċċarini zokkor abjad
• 200g sultana
• 3 kuċċarini mixed spice
• 3 imgħaref konfettura
• 100g zokkor ismar
• Madwar 350ml ilma fietel
• Madwar 150g għaġina ħelwa
• Ftit żejt biex tidlek
• 6 imgħaref zokkor imħallta ma' 6 imgħaref ilma jagħli

Metodu:

Idlek żewġ pjanċi tal-forn b'daqsxejn żejt. Għarbel id-dqiq mal-melħ u l-ispice fi skutella. Żid il-konfettura, is-sultana u z-zokkor. Ħawwad kollox flimkien. Żid iz-zokkor abjad ma’ l-ilma fietel f'reċipjent zgħir, ħawwad u xerred il-ħmira. Ħawwad sew, għatti r-reċipjent u żomm f'post sħun għal 15-il minuta.

Żid din it-taħlita mat-taħlita tad-dqiq, ħawwad sew b'idejk sakemm ikollok għaġina li m'għandiex tkun ratba jew xotta iżżejjed. Agħġen sew fuq daqsxejn dqiq għal ftit minuti. Poġġi t-taħlita fi skutella, għatti u żomm ġo post sħun għal madwar siegħa. Agħġen it-taħlita ħafif, ħafif għal nofs minuta imbagħad ifforma f'buns. Poġġi l-buns fuq il-pjanċi midluka. Iftaħ l-għaġina ħelwa fuq daqsxejn dqiq, u aqta’ fi strixxi irqaq. Poġġi żewġ strixxi fuq kull bun f'forma ta'salib. Illixxa sew.

Ħalli l-buns joqogħdu f'post sħun għal madwar 30 minuta. Aħmi l-buns ġo forn moderat għal jaħraq għal madwar 20 minuta jew sakemm jieħdu kulur dehbi skur. Oħroġ il-buns mill-forn u idlikhom bit-taħlita taz-zokkor u ilma. Erġa’ daħħalhom fil-forn għal 3 minuti. Oħroġ il-buns mill-forn u servi sħan.

Minħabba li dawn il-buns m'għandhomx bajd jew ħalib, jistgħu jittieklu waqt is-sawm tar-Randan.