minn Peter Dacoutros

Ingredjenti:

Għall-għaġina

• 450g dqiq plain
• Niskata melħ
• 225g butir mhux mielaħ, mqatta’ dadi
• 2 imgħaref corn oil
• 6 imgħaref zokkor
• Qoxra ta' lumija maħkuka
• Ftit qtar essenza tal-vanilla
• Ilma kiesaħ biex tgħaqqad

Għall-mili

• 200g butir mhux mielaħ
• 200g zokkor
• 4 bajdiet mħabbtin
• 200g lewż mitħun
• 4 qatriet essenza tal-lewż
• 50g dqiq self-raising
• 300g ġamm tal-frawli
• 3 imgħaref icing sugar biex iżżejjen

Metodu:

Għarbel id-dqiq mal-melħ fi skutella. Żid il-butir u għaġen sew b'idejk sakemm it-taħlita issir bħal frak tal-ħobż fin. Żid iż-żejt, ħallat sew imbagħad żid iz-zokkor, il-qoxra tal-lumija u l-vanilla. Għaġen għal minuta imbagħad bil-mod żid biżżejjed ilma biex tista’ tagħġen l-għaġina li m'għandhiex tkun ratba jew xotta iżżejjed. Għaġen għal żewġ minuti imbagħad ħalli l-għaġina toqgħod f'post frisk għal 30 minuta.

Idlek forma kwadra u baxxa bil-butir, u għaddi ħafif bid-dqiq. Iftaħ l-għaġina fuq daqsxejn dqiq u iksi l-qiegħ u l-ġnub tal-forma bl-għaġina. Għatti l-għaġina b’aluminium foil midluka bil-butir u għatti l-wiċċ tal-foil bil-fażola bħala toqol. Aħmi ġo forn moderat għal jaħraq għal 20 minuta. Oħroġ mill-forn, neħħi l-fażola u l-foil u ħalliha tibred sew. Ifrex il-ġamm tal-frawli fuq l-għaġina.

Ħabbat il-bajd u z-zokkor fi skutella sakemm it-taħlita ssir bajdanija u ħafifa. Żid il-bajd waħda, waħda, filwaqt li tħabbat it-taħlita. Żid il-lewż u l-essenza tal-lewż, ħabbat għal minuta. Żid id-dqiq filwaqt li tħawwad ħafif, ħafif, b'imgħarfa. Poġġi t-taħlita ġol-forma ta’ l-għaġina fuq il-ġamm tal-frawli. Illixxa sew il-wiċċ tat-taħlita. Aħmi ġo forn moderat għal ftit jaħraq sakemm tara li t-torta tkun ħadet kulur dehbi sabiħ u tkun saret sew.

Oħroġ it-torta mill-forn, ħalliha tibred sew. Xerred icing sugar fuq il-wiċċ tat-torta biex iżżejjen.