 |
 |
| 7 - 13 March 2010 |
| Ir-Randan għaddej ġmielu |
Iż-żmien gerbiebi jgħid il-qawl Malti. U hekk hu! Diġa’ wasalna fit-tielet Ħadd tar-Randan. Kif qed ngħix ir-Randan ta’ din is-sena? Qiegħed bis-serjeta’ nipprepara ruħi għall-akbar festa tal-knisja, l-Għid il-Kbir?
Matul dan ir-Randan, il-parroċċa qiegħda toffrilek bosta okkażjonijiet fejn int mistieden tisma’ l-Kelma t’Alla u tirrifletti fuqha. Il-ġimgħa li għaddiet kellna l-eżerċizzi taż-żgħażagħ fiċ-Ċentru Parrokkjali u tat-tfal fil-Kulleġġ t’Għawdex Skola Primarja Għajnsielem. Ta’ min jgħid prosit liż-żgħażagħ li attendew. Il-preżenza sabiħa tagħkom tant timliena b’tama u sodisfazzjon. Prosit ukoll tmur lil Dun Karm Refalo li wassal Kelma tajba u f’waqtha lil dawn iż-żgħażagħ tagħna. Ta’ min jgħid li dawn l-eżerċizzi ser jixxandru fuq Radju Marija fil-ġimgħat li ġejjin. L-erba’ korsijiet tal-eżerċizzi li qed isiru fil-parroċċa tagħna jixxandru kollha fuq Radju Lauretana matul l-iskeda tal-Għid li tibda fl-20 ta’ Marzu. |
| Din il-Ġimgħa Eżerċizzi għal Kulħadd |
Minn għada t-Tnejn 8 sal-Ġimgħa 12 ta’ Marzu s-sejħa hija għal kulħadd. Il-parroċċa qed toffrilek din il-possibilita’. Tgħidx m’għandix ċans, m’għandix ħin, jien m’għandix bżonn nisma’, tkun darba oħra, nisma’ kollox ‘il quddiem minn fuq ir-radju. Din il-ġimgħa għandi nsib mezz biex nattendi għall-eżerċizzi kuljum fis-6.30pm, wara l-quddiesa ta’ filgħaxija fil-Knisja Arċipretali. Iwassal il-Kelma Mons Ġużeppi Cauchi.
Infakkrek li l-Ħamis ikollna l-ġabra għas-seminarju u l-Ġimgħa ssir il-ġabra b’risq il-knisja tagħna. |
| Il-Proġett tal-Qniepen |
Il-Ġimgħa 26 ta’ Frar 2010 ġew fonduti ħames qniepen mis-sett ta’ tmienja fil-funderija Cornille-Havard ġewwa Franza. Għal dan il-mument tant sabiħ, kien hemm preżenti l-Arċipriet u għaxar parruċċani. Kien episodju sinifikattiv ħafna. Qabel ma beda l-proċess, sar it-tberik tal-metall maħlul permezz ta’ din it-talba:
Mulej Alla li tista’ kollox, int għoġbok tagħti lill-bniedem, għall-ġid tad-dinja, l-unur li jagħtik qima, nitolbuk ixħet il-barka tiegħek fuq dan il-metall.
Iva, j’Alla l-barka tiegħek tinfirex mal-forom fejn jidħol dan il-metall maħlul, biex bil-qawwa u l-protezzjoni tal-grazzja tiegħek, dawn il-qniepen jiġu fonduti mill-aħjar biex jipproduċu ħoss tajjeb u armonjuż ħalli l-fidili kollha jkunu jistgħu jinġabru fil-Knisja biex ifaħħru u jagħtu glorja lill-Isem Imqaddes tiegħek u jimxu skont il-beatitudnijiet li inti għarraftna. B’ibnek Ġesu’ Kristu Sidna. Ammen.
Huwa previst li t-tmint iqniepen ikunu lesti minn kollox bħal daż-żmien sena. Inkomplu ngħinu bit-talb u bl-offerti ġenerużi tagħna. |
| Quddiesa fiċ-Ċentru Parrokkjali |
| Illum il-Ħadd 7 ta’ Marzu fid-9.30am fiċ-Ċentru Parrokkjali ser issir quddiesa għat-tfal li din is-sena ser jirċievu l-Ewwel Tqarbina u għall-ġenituri tagħhom. Wara l-quddiesa, nieħdu xi ħaġa tajba flimkien. Inħeġġu lil dawn it-tfal u lill-ġenituri tagħhom biex jattendu. |
| Għall-Adoloxxenti tal-Griżma |
Il-Ħadd 14 ta’ Marzu għall-ewwel darba ser issir quddiesa apposta fiċ-Ċentru Parrokkjali għall-istudenti li din is-sena ser jirċievu l-Griżma tal-Isqof u l-ġenituri tagħhom. Tibda fid-9.30am. Il-parrinijiet jistgħu jattendu wkoll. Wara l-quddiesa, ikun hemm bibita.
Fil-quddiesa ta’ Ħadd il-Palm, nhar il-Ħadd 28 ta’ Marzu, 2010 fl-10.00am issir il-preżentazzjoni ta’ dawk li ser jirċievu dawn is-sagramenti. |
| Radju Lauretana |
| Mis-Sibt 20 ta’ Marzu nibdew nisimgħu programmi sbieħ fuq ir-radju tal-parroċċa tagħna. Min jixtieq jagħmel avviż ta’ mewt jew talba f’anniversarju ta’ mewt, ikellem lil Lelio Spiteri (21 561193). Dan is-servizz jingħata dejjem bla ħlas. |
| High Tea |
| Is-Sibt 6 ta’ Marzu ser ikun hemm High Tea fil-Każin tal-Banda b’risq l-istess banda u l-Għaqda tal-Armar. Nibdew wara l-quddiesa ta’ filgħaxija. |
| Immorru Ta' Pinu |
| Fuq talba ta’ persuna, nhar l-Erbgħa 10 ta’ Marzu ser immorru s-Santwarju tal-Madonna ta’ Pinu fejn ikollna quddiesa. Nitilqu mill-pjazza fit-8.30am. Trasport imħallas. |
| F’Ħadd il-Palm |
| Bħal kull sena, f’Ħadd il-Palm filgħodu jkollna l-purċissjoni mill-Knisja l-Qadima għall-Knisja Arċipretali li fiha jieħdu sehem it-tfal tagħna lebsin ta’ tfal Lhud. Tfal aħsbu għal-libsa tal-Lhud biex il-Ħadd 28 ta’ Marzu tieħdu sehem ħaj u attiv fil-funzjoni ta’ Ħadd il-Palm. |
| Bdiet il-Ħajja Eterna |
Ilqa’ fi ħdanek Mulej ir-ruħ għażiża ta’ Rosanna Bugeja mill-parroċċa tagħna li marret tiltaqa’ mal-Ħallieq nhar is-27 ta’ Frar 2010 fl-għomor ta’ 88 sena.
Mulej agħtiha l-mistrieħ ta’ dejjem. |
| Offerta għall-Bullettin |
Pawla Buttigieg toffri €30 b’sufraġju tal-erwieħ kollha tal-purgatorju.
Mulej agħtihom il-mistrieħ ta’ dejjem. |
| Biex nifhmu u ngħixu aħjar il-Quddiesa |
| Il-quddiesa ma tispiċċax bil-barka tas-saċerdot, imma tkompli lil hinn mill-bieb tal-knisja. Dak li nisma’ u ngħix fil-quddies jeħtieġ inkompli ngħixu fil-ħajja tiegħi ta’ kuljum: fil-familja, fuq il-post tax-xogħol, fl-iskola, fil-post fejn nistrieħ u niddeverti. |
| |
| L-aktar ħaġa importanti li missier jista’ jagħmel għal uliedu hija li jħobb lil ommhom. |
| Theodore Hesburgh |
